E Ngarkuara me Punë e Shteteve të Bashkuara në Tiranë, Nancy VanHorn, ka zhvilluar një takim me deputetët e rinj të Partisë Socialiste dhe Partisë Demokratike, në një lëvizje që shihet si një mesazh i qartë për forcimin e bashkëpunimit dypalësh dhe rolit të brezit të ri politik në Shqipëri.
Takimi u zhvillua në kuadër të nisjes së tyre në Programin Ndërkombëtar të Vizitorëve Udhëheqës (IVLP), një nga programet më prestigjioze të shkëmbimit të Departamentit Amerikan të Shtetit.
Sipas njoftimit të Ambasadës së SHBA, ligjvënësit e rinj do të udhëtojnë së bashku në Washington DC, Phoenix në Arizona dhe Pensacola në Florida. Qëllimi i vizitës është thellimi i bashkëpunimit SHBA–Shqipëri mbi disa prioritete kyçe.
Fokusi i programit do të jetë:
– forcimi i lidhjeve tregtare mes dy vendeve,
– promovimi i një zhvillimi ekonomik transparent,
– si dhe mbrojtja e infrastrukturës kritike përmes bashkëpunimit ndërpartiak.
“Këtë javë, e Ngarkuara me Punë Nancy VanHorn u takua me deputetë të rinj nga Partia Socialiste dhe Partia Demokratike për t’i përgëzuar ata teksa nisin Programin Ndërkombëtar të Vizitorëve Udhëheqës (IVLP)”, thuhet në deklaratën e Ambasadës, duke theksuar rëndësinë e rolit të tyre në avancimin e prioriteteve të përbashkëta mes dy vendeve.
Ky zhvillim vjen si një tjetër tregues i mbështetjes së SHBA për bashkëpunim institucional dhe dialog politik përtej ndarjeve partiake në Shqipëri.
