Senati i SHBA-së votoi për të shfuqizuar tarifat globale të Donald Trump, pas dy rezolutave të miratuara më parë këtë javë për të lehtësuar barrën mbi Kanadanë dhe Brazilin.
Katër senatorë republikanë iu bashkuan demokratëve në votimin (51-47) për të miratuar rezolutën dypartiake për t’i dhënë fund tarifave të rritura mbi aleatët si Bashkimi Evropian, Japonia dhe Koreja e Jugut.
Megjithatë, Dhoma e Përfaqësuesve nuk ka gjasa ta marrë në konsideratë masën, pasi udhëheqja republikane ka bllokuar votimet për tarifat e Trump deri në marsin e ardhshëm. Për më tepër, edhe nëse Dhoma e Përfaqësuesve miraton përfundimisht këtë ose rezoluta të tjera për tarifat, Kongresit do t’i duhej një shumicë prej dy të tretash për të anashkaluar një veto presidenciale.
Më parë, Trump njoftoi uljen e tarifave ndaj Kinës, pas një takimi “vërtet të shkëlqyer” me Presidentin Xi Jinping në Korenë e Jugut. Ai u tha gazetarëve në bordin e Air Force One, se Shtetet e Bashkuara do të ulnin tarifat e vendosura për fentanilin me 10 pikë.
Presidenti amerikan vuri në dukje gjithashtu se Xi kishte rënë dakord të blinte “sasi të mëdha” soje dhe produkte të tjera bujqësore nga SHBA-ja.
Trump kthehet në Shtetet e Bashkuara, ku mbyllja e qeverisë federale ka hyrë në ditën e 30-të. Programi i Ndihmës Plotësuese për Ushqimin (SNAP) është një shqetësim i madh për miliona amerikanë, pasi përfitimet pritet të përfundojnë të shtunën. Por nuk është problemi i vetëm i përkeqësuar nga mungesa e fondeve.
Të dyja palët po kërkojnë mënyra për t’i dhënë fund ngërçit qeveritar që javën e ardhshme, megjithëse rruga drejt një marrëveshjeje mbetet e pasigurt.
