Departamenti Amerikan i Shtetit i është përgjigjur interesimit të gazetarit të Top Channel se çfarë është diskutuar gjatë takimit Brendan Hanrahan, zyrtar i lartë në Byronë për Çështjet Evropiane dhe Euroaziatike në Departamentin e Shtetit me kreun e SPAK dy ditë më parë.
Një zyrtar i DASH në përgjigjen për gazetarin e Top Channel Muhamed Veliu tha:
“Shtetet e Bashkuara po punojnë me Shqipërinë për qëllimet tona të përbashkëta të ndalimit të trafikut të drogës, krimit të organizuar dhe migracionit të parregullt. Zyrtarë të lartë të Departamentit u takuan me Kreun e Prokurorisë së Posaçme (SPAK), Dumani, për të diskutuar fusha të bashkëpunimit me përfitim të ndërsjellë”.
Vizita e kreut të SPAK në Uashington ndodhi në një moment vendimtar për Prokurorinë e Posaçme dhe institucionet e reja të drejtësisë në Shqipëri. Këshilli i Lartë i Prokurorisë pritet që pas pak javësh të hapë garën për drejtuesin e ri të Prokurorisë së Posaçme ndërsa shumë shpejt pritet të zgjidhet edhe kreu i Byrosë Kombëtare të Hetimit.
Ky takim mes Dumanit dhe Hanrahan, erdhi si një sinjal i qartë mbështetje nga SHBA për reformat në drejtësi dhe përpjekjet për ndëshkimin dhe “çrrënjosjen” e korrupsionit duke mos toleruar askënd, pavarësisht pozitave të tyre politike.
Takimi është zhvilluar tre ditë me dyer të mbyllura pa praninë e gazetarëve.
Vitin e kaluar Dumani u nderua me çmimin “Kampion në Luftën Kundër Korrupsionit”, dhënë nga ish-Sekretari i Shtetit Antony Blinken.
