Udhëheqësit e Tajlandës dhe Kamboxhias do të marrin pjesë në bisedimet e ndërmjetësimit mbi konfliktin e tyre vdekjeprurës kufitar, që do të mbahen në Malajzi të hënën, tha qeveria tajlandeze, edhe pse të dyja palët akuzuan njëra-tjetrën për nisjen e sulmeve të reja me artileri në zonat e kontestuara.
Bisedimet janë planifikuar të fillojnë në orën 15:00 sipas orës lokale të hënën, me kryeministrin në detyrë Phumtham Wechayachai që kryeson ekipin negociator tajlandez, njoftoi qeveria në një deklaratë.
Numri i të vdekurve është rritur mbi 30, përfshirë 13 civilë në Tajlandë dhe tetë në Kamboxhia, ndërsa autoritetet raportojnë se më shumë se 200,000 njerëz janë evakuuar nga zonat kufitare.
Bisedimet e së hënës vijnë pasi kryeministri malajzian Anwar Ibrahim javën e kaluar propozoi një armëpushim dhe presidenti amerikan Donald Trump tha të shtunën se të dy udhëheqësit kishin rënë dakord të punonin për një armëpushim.
Bangkoku dhe Phnom Penhu kanë akuzuar palën tjetër për shkaktimin e armiqësive të javës së kaluar.
Ministria e Mbrojtjes e Kamboxhias tha se Tajlanda kishte bombarduar dhe nisur sulme tokësore të dielën në mëngjes në një numër pikash përgjatë kufirit.
“Për mua, mendoj se është shumë mirë nëse Tajlanda pranon të ndalojë luftimet në mënyrë që të dy vendet të mund të jetojnë në paqe”, tha për Reuters studenti i universitetit Phnom Penh, Sreung Nita.
Ushtria tajlandeze tha se forcat kamboxhiane kishin qëlluar në disa zona, duke përfshirë edhe pranë shtëpive të civilëve, të dielën, dhe po mobilizonin raketahedhës me rreze të gjatë veprimi.
“Situata mbetet e tensionuar dhe trupat kamboxhiane mund të jenë duke përgatitur operacione ushtarake të intensifikuara për të shkaktuar dëme maksimale në fazat e fundit para negociatave”, tha ushtria në një përditësim.
Një klinikë shëndetësore qeveritare rreth 10 km nga kufiri kishte dritare të thyera, mure të shembura dhe instalime elektrike të ekspozuara. Mediat lokale raportuan se u godit nga artileria të shtunën, dy ditë pasi ndërtesa dhe lagjja përreth u evakuuan.
“Është shumë mirë që Amerika po këmbëngul për armëpushimin sepse kjo do të sillte paqe”, tha për Reuters banori i Sisaket, Thavorn Toosawan.
Tailanda dhe Kamboxhia janë grindur për dekada të tëra për pikat e pashënuara përgjatë kufirit të tyre tokësor 817 km (508 milje), me pronësinë e tempujve të lashtë hindu Ta Moan Thom dhe Preah Vihear të shekullit të 11-të që janë në qendër të mosmarrëveshjeve.
Preah Vihear iu dha Kamboxhias nga Gjykata Ndërkombëtare e Drejtësisë në vitin 1962, por situata u përkeqësua në vitin 2008 pasi Kamboxhia u përpoq ta listonte atë si një vend të Trashëgimisë Botërore të UNESCO-s. Përleshjet gjatë disa viteve sollën të paktën një duzinë vdekjesh.
Kamboxhia tha në qershor se i kishte kërkuar Gjykatës Ndërkombëtare të Drejtësisë të zgjidhte mosmarrëveshjet e saj me Tajlandën. Bangkoku thotë se nuk e ka njohur kurrë juridiksionin e gjykatës dhe preferon një qasje dypalëshe
