Dy ministra izraelitë janë sanksionuar nga qeveria e Mbretërisë së Bashkuar. Ata janë ministrat e ekstremit të djathtë, Itamar Ben-Gvir dhe Bezalel Smotrich. Reagimi erdhi si përgjigje ndaj komenteve dhe qëndrimeve të tyre, lidhur me konfliktin në Gaza. Ky vendim, i shpallur sot nga sekretari i jashtëm, David Lammy, do t’u ndalojë dy ministrave hyrjen në Mbretërinë e Bashkuar dhe do t’u ngrijë të gjitha asetet e tyre atje.
David Lammy theksoi se Ministri i Financave, Smotrich, dhe Ministri i Sigurisë Kombëtare, Ben-Gvir, kishin “nxitur dhunë ekstremiste dhe abuzime serioze të të drejtave të njeriut ndaj palestinezëve”. Ky veprim është një shenjë e qartë e ashpërsimit të qëndrimit të Britanisë së Madhe ndaj politikave të qeverisë izraelite.
Si Smotrich ashtu edhe Ben-Gvir kanë qenë nën kritika të forta për qëndrimet e tyre radikale. Smotrich ka bërë fushatë kundër lejimit të ndihmës humanitare në Gaza, ndërsa Ben-Gvir ka bërë thirrje për zhvendosjen e detyruar të banorëve të Gazës nga territori.
Pas njoftimit të sanksioneve, Lammy deklaroi: “Këto veprime nuk janë të pranueshme. Kjo është arsyeja pse ne kemi ndërmarrë veprime tani – për t’i mbajtur përgjegjësit para përgjegjësisë.”
Ai shtoi se Britania e Madhe do të vazhdojë të punojë për “një armëpushim të menjëhershëm në Gaza, lirimin e menjëhershëm të pengjeve të mbetura nga Hamasi… një rritje të ndihmës dhe një rrugë drejt një zgjidhjeje me dy shtete.”
Nga ana e tij, Izraeli reagoi ashpër ndaj sanksioneve. Ministri i Jashtëm izraelit, Gideon Saar, e quajti vendimin “të papranueshëm” dhe njoftoi se kabineti do të mblidhej javën e ardhshme për të diskutuar përgjigjen. Ministria e Jashtme izraelite deklaroi se ishte “skandaloze që përfaqësuesit e zgjedhur dhe anëtarët e qeverisë i nënshtrohen këtyre lloj masash.”
