Një seri sulmesh të koordinuara tronditi qytetin e Selanikut në orët e para të mëngjesit, ku banesat e tre zyrtarëve të partisë në pushtet, Demokracia e Re, u vunë në shënjestër brenda vetëm 20 minutash. Sulmet, të kryera me bombola gazi, lanë pas disa të plagosur, mes tyre një grua 70-vjeçare që ndodhet në gjendje kritike për jetën.
Sipas autoriteteve greke, sulmet ndodhën në tri zona të ndryshme të Selanikut dhe dyshohet se autorët lëviznin me motoçikleta. Për shkak të natyrës së koordinuar të ngjarjeve, hetimet janë marrë përsipër nga Shërbimi Antiterror i Greqisë, i cili po shqyrton mundësinë që bëhet fjalë për një sulm të organizuar me motive politike.
Ngjarja më e rëndë u regjistrua rreth orës 04:35 në zonën Harilaou, ku një bombol gazi e vendosur pranë banesës së Aphrodite Nestorës, zyrtare e lartë e Demokracisë së Re dhe avokate e njohur, shkaktoi një zjarr të fuqishëm. Flakët u përhapën me shpejtësi, duke përfshirë dy automjete dhe dy motoçikleta të parkuara pranë godinës.
Si pasojë e zjarrit, nëna 70-vjeçare e Nestorës pësoi djegie të rënda në pjesën më të madhe të trupit dhe po trajtohet e intubuar në Njësinë e Kujdesit Intensiv të Spitalit “Hipokratio”. Vetë Aphrodite Nestora mori lëndime të lehta nga djegiet, ndërsa babai i saj dhe dy banorë të tjerë të pallatit u transportuan në spital për shkak të problemeve me frymëmarrjen të shkaktuara nga tymi.
Vetëm pak minuta më herët, rreth orës 04:23, një tjetër bombol gazi shpërtheu në hyrje të pallatit ku banon ish-deputeti Savvas Anastasiadis, në zonën Tumba. Shpërthimi shkaktoi dëme të konsiderueshme në hyrjen e godinës, duke thyer xhamat dhe dëmtuar fasadën, por fatmirësisht nuk pati persona të lënduar.
Sulmi i parë u regjistrua në orën 04:18 në zonën Pylaia, ku një bombol gazi u aktivizua pranë një godine që më parë kishte shërbyer si banesë e Zisis Ioakimoviçit, ish-kryetar i Komitetit Drejtues të Demokracisë së Re në Selanik. Në këtë rast nuk u raportuan dëme të konsiderueshme materiale apo të lënduar.
Policia greke ka rrethuar zonat e prekura dhe po analizon pamjet e kamerave të sigurisë, ndërsa hetuesit po përpiqen të identifikojnë autorët dhe motivet e sulmeve. Autoritetet nuk përjashtojnë asnjë pistë hetimi, ndërsa masat e sigurisë janë forcuar në objektet dhe banesat e zyrtarëve publikë në Selanik.
