Një ngjarje e rëndë ka tronditur paraditen e kësaj të diele qytetin e Durrësit, ku një fëmijë vetëm 11 vjeç ka humbur jetën pasi dyshohet se është mbytur gjatë kohës që po lahej në det.
Sipas informacioneve paraprake, ngjarja ka ndodhur rreth orës 10:35. Viktima është një 11-vjeçar me banim në Tiranë, i cili ndodhej në bregdet së bashku me familjarët kur ka hyrë në ujë për t’u larë.
Rrethanat e plota të ngjarjes mbeten ende të paqarta, ndërsa dyshohet se fëmija është mbytur aksidentalisht. Menjëherë pas marrjes së njoftimit, në vendngjarje kanë mbërritur shërbimet e policisë dhe grupi hetimor, të cilët kanë nisur veprimet për zbardhjen e plotë të rastit.
Autoritetet po punojnë për dokumentimin e çdo rrethane që lidhet me ngjarjen, si dhe për përcaktimin e shkakut të saktë të mbytjes.
Ngjarja ka shkaktuar trishtim të thellë te familjarët dhe pushuesit e pranishëm në zonë, ndërsa hetimet vijojnë për të hedhur dritë mbi këtë tragjedi që i mori jetën një fëmije në moshë të mitur.
