Forcat e sigurisë në Turqi kanë zhvilluar një operacion të gjerë në kryeqytetin Ankara, duke arrestuar më shumë se 200 persona të dyshuar për lidhje me grupe ekstremiste, përfshirë edhe organizatën e Shtetit Islamik (ISIS).
Operacioni është zhvilluar në kuadër të masave të shtuara të sigurisë përpara samitit të NATO-s, i cili pritet të mbahet muajin e ardhshëm në Turqi, ku do të marrin pjesë liderët e 32 vendeve anëtare të aleancës, përfshirë edhe Presidentin amerikan Donald Trump.
Sipas autoriteteve turke, prokuroria ka lëshuar urdhër-arreste për 241 persona, ndërsa 209 prej tyre janë arrestuar gjatë bastisjeve të policisë dhe xhandarmërisë në zonën përreth Ankarasë. Operacioni ka vijuar edhe gjatë ditës, me qëllim kapjen e personave të mbetur në kërkim.
Ndër të arrestuarit raportohen edhe individë të dyshuar si luftëtarë të ISIS-it, si dhe persona të lidhur me organizata të tjera ekstremiste, përfshirë një grup të ekstremit të majtë të akuzuar për sulme të armatosura në të kaluarën.
Autoritetet turke kanë paralajmëruar masa të rrepta sigurie për samitin e NATO-s, duke përfshirë kufizime në lëvizje, ndalim të protestave në zona të caktuara, si dhe izolimin e disa hapësirave rreth vendeve ku do të qëndrojnë delegacionet.
Operacioni vjen në një periudhë kur Turqia ka intensifikuar kontrollet ndaj grupeve të dyshuara ekstremiste, pas një sërë bastisjesh të ngjashme në muajt e fundit, të cilat kanë çuar në qindra arrestime në shkallë vendi.
