Presidenti amerikan Donald Trump ka hapur zyrtarisht festimet për 250-vjetorin e Pavarësisë së Shteteve të Bashkuara me një tubim madhështor në Qendrën Kombëtare në Uashington, i shoqëruar nga fluturime bombarduesish, muzikë ushtarake dhe interpretimi i këngës “God Bless the USA” nga Lee Greenwood.
“Askush nuk ka bërë diçka si Shtetet e Bashkuara të Amerikës, dhe së bashku po e bëjmë më të madhe, më të mirë, më të fortë dhe më të jashtëzakonshme se kurrë më parë”, deklaroi Trump gjatë fjalimit të tij.
Ai theksoi se administrata e tij e ka rikthyer vendin në madhështi, duke shtuar se “pak kohë më parë ishim një vend i vdekur, tani jemi vendi më i nxehtë në botë dhe na respektojnë të gjithë”.
“Amerika është kthyer. Dikur ishim një vend i vdekur. Sot askush nuk qesh më me ne,” u shpreh presidenti amerikan.
Ky aktivitet shënoi nisjen e një serie festimesh në të gjithë vendin për 250-vjetorin e pavarësisë së SHBA-së, të përqendruara në “Panairin e Madh të Shtetit Amerikan” në National Mall, mes Kapitolit dhe Memorialit të Lincoln-it.
