Kreu i PD, Sali Berisha, ka reaguar pas rizgjedhjes në krye të forcës politike që drejton, duke e cilësuar votën e demokratëve si një fitore ndaj asaj që ai e quan “narkomafia më e rrezikshme në Europë”.
Në një mesazh të gjatë të publikuar në rrjetet sociale, Berisha deklaroi se procesi i votimit në PD tregoi forcën e demokracisë direkte dhe vullnetin e lirë të anëtarësisë, pavarësisht, sipas tij, sulmeve politike dhe mediatike ndaj opozitës.
Ai theksoi se modeli “një anëtar, një votë” mbetet forma më demokratike e përzgjedhjes së drejtuesve politikë dhe akuzoi Partia Socialiste e Shqipërisë dhe kryeministrin Edi Rama se, sipas tij, kanë zëvendësuar votën e lirë me kontrollin politik dhe ndikimin e krimit.
Berisha pretendoi se gjatë muajve të fundit është zhvilluar një fushatë e koordinuar kundër Partisë Demokratike, duke akuzuar qeverinë, mediat pranë saj dhe grupet kriminale për tentativa destabilizimi dhe manipulimi të procesit politik brenda opozitës.
Sipas tij, pjesëmarrja masive e demokratëve në votim ishte një përgjigje ndaj presioneve dhe një dëshmi se opozita mbetet forca kryesore kundër qeverisë aktuale.
Në fund të reagimit të tij, Berisha deklaroi se vota e demokratëve përfaqësonte “triumfin e dinjitetit” dhe një mesazh kundër frikës, manipulimit dhe kontrollit politik në vend.
