Kryeministri i Libanit Nawaf Salam ka deklaruar se Bejruti nuk synon normalizimin e marrëdhënieve me Izraelin, por vetëm arritjen e një gjendjeje paqeje, në një moment tensionesh të larta në rajon.
Duke folur për mediat, Salam i cilësoi si të parakohshme diskutimet për një takim të mundshëm me kryeministrin izraelit Benjamin Netanyahu, duke theksuar se çdo kontakt në nivel të lartë kërkon përgatitje të thellë dhe kushte të përshtatshme politike.
“Libani nuk po kërkon normalizim me Izraelin, por paqe. Kjo nuk është hera e parë që Libani angazhohet në negociata të drejtpërdrejta,” u shpreh ai.
Sipas kryeministrit libanez, konsolidimi i armëpushimit aktual mund të shërbejë si bazë për një raund të ri bisedimesh që mund të zhvillohet në Uashington, por ai theksoi se kushtet aktuale ende nuk janë të përshtatshme për takime të nivelit të lartë.
Salam shtoi gjithashtu se kërkesa minimale e Libanit mbetet përcaktimi i një afati për tërheqjen e forcave izraelite nga territori libanez, si dhe hartimi i një plani për vendosjen e plotë të kontrollit të armëve nën autoritetin e shtetit.
Sipas tij, palët kanë zhvilluar tashmë dy raunde bisedimesh në Uashington më 14 dhe 23 prill, si pjesë e përgatitjeve për një proces më të gjerë negociues, ndërsa pritet edhe një raund i tretë në ditët në vijim.
Megjithatë, situata në terren mbetet e tensionuar. Pavarësisht një armëpushimi të shpallur më 17 prill dhe të zgjatur deri më 17 maj, sulmet izraelite në territorin libanez vijojnë, duke shkaktuar viktima dhe shkatërrime të shumta në zona civile.
Sipas të dhënave të fundit, që nga fillimi i përshkallëzimit të konfliktit, mijëra persona kanë humbur jetën dhe qindra mijëra të tjerë janë zhvendosur, duke thelluar krizën humanitare në vend.
