Një vlerësim i ri i sigurisë nga Bashkimi Europian, i publikuar sipas Radio Evropa e Lirë, paralajmëron për rritje të ndjeshme të kërcënimeve terroriste dhe ekstremiste në territorin europian, duke përfshirë rreziqe nga Afganistani, Irani dhe ndikimet e luftës në Ukrainë.
Sipas dokumentit, niveli i përgjithshëm i kërcënimit në vendet e BE-së mbetet “i lartë”, ndërsa terrorizmi me motive islamiste dhe xhihadiste vijon të konsiderohet rreziku kryesor për sigurinë e bllokut.
Raporti, i përgatitur nga Këshilli i Bashkimit Europian që përfaqëson qeveritë e 27 shteteve anëtare, bazohet kryesisht në zhvillimet e vitit 2025 dhe në trendet e sigurisë që kanë ndikuar në rritjen e rrezikut në kontinent.
Në dokument theksohet se përshkallëzimi i situatës në Iran mund të sjellë pasoja të drejtpërdrejta edhe në Europë, përfshirë mundësinë e aktivizimit të rrjeteve të fjetura apo grupeve të lidhura me sulme hakmarrëse terroriste, veçanërisht në vende me komunitete të mëdha hebraike dhe myslimane.
Po ashtu, raporti ngre shqetësim për situatën në Afganistan, ku dega rajonale e Shtetit Islamik – ISIS-Khorasan – cilësohet si një nga kërcënimet më serioze të jashtme për Europën, për shkak të aktivitetit të vazhdueshëm dhe propagandës online që synon rekrutimin e të rinjve.
Dokumenti paralajmëron gjithashtu se pasojat e luftës në Ukrainë kanë krijuar efekte shtesë destabilizuese në fushën e sigurisë, duke rritur kompleksitetin e rrezikut terrorist në kontinentin europian.
