Japonia po përballet me një nga zjarret më të mëdha pyjore të viteve të fundit, ndërsa autoritetet kanë dislokuar rreth 1,400 zjarrfikës dhe 100 trupa të Forcave të Vetëmbrojtjes për të ndalur përhapjen e flakëve në veri të vendit.
Zjarret po digjen për ditën e pestë radhazi dhe kanë përfshirë tashmë mbi 1,300 hektarë tokë, duke vazhduar të përparojnë në zona të banuara.
Zona më e goditur
Situata më e rëndë raportohet në qytetin bregdetar Otsuchi, ku flakët po kërcënojnë lagje të tëra banimi. Autoritetet kanë urdhëruar evakuimin e mbi 3,200 banorëve, rreth një e treta e popullsisë së qytetit.
Ky qytet ka një histori të dhimbshme, pasi humbi një pjesë të madhe të popullsisë gjatë tërmetit dhe cunamit të vitit 2011.
Luftë nga ajri dhe toka
Helikopterë ushtarakë dhe civilë po hedhin ujë vazhdimisht mbi vatrat e zjarrit, ndërsa ekipet tokësore po përpiqen të mbajnë flakët larg zonave të banuara.
Autoritetet japoneze paralajmërojnë se situata mbetet serioze dhe e paqëndrueshme, ndërsa erërat mund ta përkeqësojnë përhapjen e zjarrit në orët në vijim.
