Presidenti i Donald Trump ka reaguar ashpër në rrjetin e tij social Truth Social, duke akuzuar ish-drejtorin e FBI, James Comey, për përdorimin e një kodi që sipas tij përbën kërcënim të drejtpërdrejtë ndaj jetës së tij.
Në reagimin e tij, Trump i referohet termit “86”, i cili sipas tij përdoret në zhargon kriminal me kuptimin “eliminoje” ose “vrite”. Ai pretendon se kombinimi “86 47” nënkupton një mesazh të fshehtë për eliminimin e tij si president i Shteteve të Bashkuara.
Duke e cilësuar situatën si serioze, Trump akuzon Comey-n se është plotësisht i vetëdijshëm për kuptimin e këtij kodi dhe e etiketon atë si një figurë të korruptuar brenda sistemit të drejtësisë amerikane. “Ai e di shumë mirë çfarë do të thotë kjo,” shkruan Trump, duke shtuar akuza të forta personale ndaj ish-zyrtarit të lartë.
Në postimin e tij, presidenti përdor edhe shprehje me ngarkesë të fortë simbolike, si “tetë milje larg, gjashtë këmbë nën tokë”, duke lënë të kuptohet se bëhet fjalë për një kërcënim serioz ndaj jetës së tij.
Trump ka ngritur gjithashtu dyshime mbi deklarimet e Comey-t përpara autoriteteve, duke sugjeruar se ai mund të ketë gënjyer edhe ndaj vetë strukturave të FBI-së lidhur me këtë çështje.
Situata është tensionuar më tej pas raportimeve se ish-drejtori i FBI-së është paraqitur në polici një ditë më parë, duke shtuar spekulimet për hetime të mundshme.
Kjo përplasje e re mes Trump dhe Comey vjen në një klimë të polarizuar politike në SHBA, ku akuzat dhe kundërakuzat mes figurave të larta vijojnë të thellojnë ndarjet dhe tensionet në skenën publike.
