Të paktën tetë persona kanë humbur jetën si pasojë e sulmeve ajrore izraelite në jug të Libanit, sipas autoriteteve vendase, në një tjetër përshkallëzim të dhunës në rajon.
Pesë viktima u raportuan në qytetin Mazdal Zoun, ku bombardimet goditën zonën ndërsa ekipet e shpëtimit ishin në terren për të nxjerrë të plagosurit nga rrënojat. Tre shpëtimtarë humbën jetën gjatë operacioneve, pasi u zunë poshtë strukturave të shembura.
Sipas Mbrojtjes Civile libaneze, sulmet ndodhën pikërisht në momentin kur po zhvilloheshin përpjekjet për evakuim, ndërsa dy ushtarë u plagosën gjatë ndërhyrjes.
Ndërkohë, në qytetin Zuwaya, një tjetër sulm shkaktoi një viktimë dhe 15 të plagosur, mes tyre edhe fëmijë. Viktima të tjera u raportuan edhe në zona më në veri, duke e çuar bilancin total në tetë të vdekur.
Presidenti i vendit, Joseph Aoun, dënoi ashpër sulmet, duke akuzuar Izrael për shkelje të ligjit ndërkombëtar dhe të konventave që mbrojnë civilët.
Nga ana tjetër, ushtria izraelite njoftoi se ka shkatërruar dy tunele të Hezbollah në zonën kufitare, duke pretenduar se ato përdoreshin për operacione kundër territorit izraelit. Sipas deklaratave zyrtare, për shpërthimin e tyre janë përdorur qindra ton eksploziv.
Situata në kufirin jugor të Libanit mbetet e tensionuar, ndërsa përplasjet dhe sulmet ajrore po rrisin frikën për një përshkallëzim më të gjerë të konfliktit në Lindjen e Mesme.
