Pas përfundimit të protestës së organizuar nga Partia Demokratike në kryeqytet, ministri i Punëve të Brendshme, Besfort Lamallari, ka dalë me një deklaratë publike ku vlerëson veprimet e Policisë së Shtetit dhe dënon ashpër episodet e dhunës të regjistruara gjatë tubimit.
Në reagimin e tij, Lamallari thekson se strukturat e rendit kanë vepruar me profesionalizëm, vetëpërmbajtje dhe shpejtësi në përballjen me personat që, sipas tij, përdorën mjete të rrezikshme si kokteje molotovi, duke tentuar të krijojnë kaos dhe të rrezikojnë sigurinë publike.
“Policia e Shtetit reagoi në mënyrë profesionale dhe të matur, duke neutralizuar menjëherë personat që përdorën molotovë si mjete dhune, me qëllim djegien e qytetit dhe rrezikimin e jetës së efektivëve dhe qytetarëve,” deklaroi ministri.
Ai shtoi se ngjarje të tilla nuk mund të cenojnë stabilitetin e vendit dhe se institucionet do të vijojnë të garantojnë rendin publik pa asnjë tolerim ndaj dhunës.
Sipas Lamallarit, përpjekjet për të përdorur dhunën në protestë përbëjnë një tentativë për të devijuar vëmendjen nga problemet politike dhe për të tensionuar situatën në vend.
“Shqipëria nuk do të merret peng nga një pakicë që zgjedh rrugën e dhunës. Mes atyre që ndërtojnë të ardhmen europiane të vendit dhe atyre që kërkojnë ta dëmtojnë atë, qytetarët e kanë bërë tashmë zgjedhjen e tyre të qartë,” u shpreh ai.
Protesta e opozitës u zhvillua në mbrëmje në Tiranë, nën masa të shtuara sigurie, dhe u shoqërua me tensione sporadike mes protestuesve dhe forcave të rendit, përpara se situata të vihej plotësisht nën kontroll.
