Në Gjykatën Themelore të Prishtinës është mbajtur seanca përfundimtare ndaj Naim Murseli, Kushtrim Kokalla dhe Granit Plava, të akuzuar për përfshirje në vrasjen e Liridona Ademajt.
Gjatë kësaj seance, Prokuroria ka paraqitur kërkesën përfundimtare, duke kërkuar që tre të pandehurit të shpallen fajtorë dhe të dënohen me burgim të përjetshëm për veprën penale të vrasjes së rëndë.
Prokurorja e rastit, Javorka Perlinqeviq, deklaroi se provat e administruara gjatë gjykimit, përfshirë dëshmitë, analizat e komunikimeve dhe materialet filmike, tregojnë një version të koordinuar të ngjarjes dhe përpjekje për shmangie të përgjegjësisë penale nga të akuzuarit.
Sipas saj, hetimet kanë zbuluar se në ditën kritike janë vërejtur lëvizje të përbashkëta mes të dyshuarve, si dhe elemente që lidhen me sigurimin e armës së përdorur në krim. Prokuroria ka theksuar gjithashtu se ekzistojnë mospërputhje mes deklarimeve të mbrojtjes dhe provave materiale.
Në seancë u përmendën edhe dëshmi të familjarëve të viktimës, përfshirë deklarimet e fëmijëve të saj, të cilat janë dhënë në prani të psikologut dhe autoriteteve përkatëse.
Sipas aktakuzës, Naim Murseli dyshohet si organizator i krimit, Granit Plava si ekzekutuesi i vrasjes, ndërsa Kushtrim Kokalla si person që ka ndihmuar në lidhjen mes palëve të përfshira.
Liridona Ademaj u vra në nëntor të vitit 2023, një ngjarje që ka shkaktuar reagim të madh publik në Kosovë dhe më gjerë. Seanca gjyqësore pritet të vijojë me vendimin përfundimtar të gjykatës.
