Napoli ka dhënë një sinjal të fortë force në garën për Champions League, duke mposhtur bindshëm Cremonese me rezultatin 4–0 në stadiumin “Diego Armando Maradona”.
Ekipi i Italisë së Jugut rikthehet te fitorja me një paraqitje dominante, duke e mbyllur praktikisht ndeshjen brenda 52 minutave. Tre nga golat erdhën në një periudhë të shkurtër mes fundit të pjesës së parë dhe fillimit të së dytës, duke shkatërruar çdo shpresë të kundërshtarit.
Në listën e golashënuesve u regjistruan Scott McTominay, një autogol i Giovanni Terracciano, si dhe realizime nga Kevin De Bruyne dhe Alison Santosh.
Pas ndeshjes, trajneri Antonio Conte u shfaq i kënaqur, duke mbrojtur skuadrën nga kritikat e fundit dhe duke rikujtuar sukseset e mëparshme të Napolit, përfshirë dy tituj kampion në tre vitet e fundit dhe fitimin e Superkupës.
Një lajm i mirë erdhi edhe për mbrojtjen, me rikthimin si titullar të kapitenit të Kosovës Amir Rrahmani, i cili u kthye pas një dëmtimi të gjatë dhe madje ishte pranë golit duke goditur traversën.
Me këtë fitore, Napoli ngjitet në 78 pikë dhe mbetet shumë pranë sigurimit të një vendi në UEFA Champions League, duke qenë 3 pikë larg Milanit dhe me një avantazh të madh ndaj rivalëve në garën për katërshen e parë.
Forma e fundit tregon qartë se kampionët në fuqi po rikthehen në momentin vendimtar të sezonit.
