Bordi i Transparencës ka njoftuar ndryshime të reja në çmimet e karburanteve në vend, duke sjellë një ulje të naftës dhe një rritje të benzines, në një vendim që hyn në fuqi nga sot në orën 18:00.
Sipas vendimit të publikuar, çmimi i naftës (gazoil) ulet me 3 lekë për litër, ndërsa benzina rritet me 3 lekë për litër. Këto ndryshime vijnë në kuadër të luhatjeve të tregut ndërkombëtar dhe situatës së tensionuar në Lindjen e Mesme, që ka ndikuar në çmimet e energjisë.
Sipas tabelës së re të miratuar, nafta do të shitet jo më shumë se 217 lekë për litër në tregun me pakicë, ndërsa benzina arrin në 176 lekë për litër. Çmimet me shumicë janë përcaktuar përkatësisht 205 lekë për naftën dhe 164 lekë për benzinën.
Autoritetet theksojnë se këto çmime do të mbeten në fuqi deri në mbledhjen e radhës së Bordit, ku do të bëhet një rishikim i ri në varësi të zhvillimeve në treg.
Në njoftim nënvizohet gjithashtu se operatorët e tregut janë të detyruar të zbatojnë vendimin, ndërsa shkeljet do të ndëshkohen deri në pezullim aktiviteti.
Institucionet përgjegjëse për ekonominë dhe energjinë kanë deklaruar se po ndjekin situatën nga afër për të mbrojtur konsumatorët dhe për të ruajtur stabilitetin e tregut vendas të karburanteve.
