Barcelona po përgatit një tjetër goditje të madhe në merkato, dhe këtë herë “sponsori” kryesor është vetë Lionel Messi. Legjenda argjentinase i ka rekomanduar klubit katalunas afrimin e sulmuesit të Inter Milan, Lautaro Martínez.
Emri i Lautaros është rikthyer fuqishëm në listën e dëshirave të Barcelonës, ndërsa drejtori sportiv Deco po analizon opsionet për të forcuar repartin ofensiv për sezonin e ardhshëm. Interesi nuk është i ri, por këtë herë merr peshë të veçantë falë mbështetjes së Messit, me të cilin Lautaro ka krijuar një partneritet të shkëlqyer në kombëtaren e Argjentinës.
Sulmuesi i Interit është shndërruar në një nga lojtarët më të kompletuar në Europë. Ai spikat për lëvizshmërinë, presionin agresiv dhe aftësinë për t’u përfshirë në ndërtimin e aksioneve – cilësi që përputhen perfekt me stilin e lojës së Barcelonës. Për më tepër, eksperienca në garat europiane dhe roli si lider te Interi e bëjnë një profil ideal për një skuadër që synon majat.
Nga ana tjetër, vetë Lautaro mund të jetë i hapur për një aventurë të re pas disa sezonesh në Itali. La Liga mbetet një destinacion joshës dhe Barcelona një mundësi e artë për një hap tjetër të madh në karrierë.
Megjithatë, operacioni pritet të jetë i vështirë. Interi nuk ka ndërmend të heqë dorë lehtë nga kapiteni i saj dhe kërkesat financiare mund të jenë shumë të larta. Kjo e detyron Barcelonën të bëjë llogari të kujdesshme, duke pasur parasysh edhe kufizimet ekonomike.
Vera pritet të jetë vendimtare: nëse arrihet marrëveshja, Barcelona mund të sigurojë një “killer” të vërtetë për sulmin – një transferim që mund të ndryshojë fatin e sezonit.
