Finalistja Selin përjetoi një moment tejet emocional gjatë një performance artistike, ku baleti i saj u shoqërua me një surprizë të veçantë që e preku thellë.
Pas një interpretimi të vlerësuar si mahnitës, ajo mori një mesazh virtual nga babai i saj, i cili nuk ishte fizikisht i pranishëm, por i drejtoi fjalë të mbushura me emocione, krenari dhe mirënjohje. Ky moment bëri që Selin të shpërthente në lot përpara publikut.
Në mesazhin e tij, babai i saj u shpreh se ajo e kishte bërë të ndihej sërish krenar dhe “e kishte bërë të vishej përsëri me kostum”, duke nënvizuar se vajza e tij i kishte rikthyer emocionet dhe krenarinë si prind.
Ai kërkoi falje që nuk kishte qenë pranë saj fizikisht për ta përqafuar, por shtoi se ishte i bindur se ajo kishte marrë mbështetje dhe përqafime simbolike nga njerëz të shumtë.
“Maratona jote ka qenë e vështirë, plot pengesa, por ti ia dole të bëhesh një kampione e vërtetë,” u shpreh ai, duke vlerësuar gjithashtu edhe figurën e gjyshit të saj, mësuesit, pedagogët dhe të gjithë ata që kanë kontribuar në rrugëtimin e saj artistik.
Ai theksoi edhe mbështetjen e madhe të publikut nga rajone të ndryshme, duke përmendur Kosovën, Maqedoninë e Veriut, Malin e Zi dhe Çamërinë, si dhe falënderoi televizionin që i dha hapësirë talentit të saj.
