Qeveria e Iranit ka ngritur një kërkesë të re strategjike për vendosjen e një “regjimi të veçantë” në Ngushticën e Hormuzit, duke e cilësuar këtë korridor jetik detar si një aset me rëndësi të jashtëzakonshme për vendin.
Zëdhënësja e qeverisë iraniane, Fatemeh Mohajerani, deklaroi se kjo rrugë ujore duhet të ketë një status të posaçëm në raport me marrëdhëniet ndërkombëtare, duke theksuar se Hormuzi nuk është thjesht një kalim detar, por një instrument kyç për ndërveprim ekonomik dhe politik.
Kjo deklaratë vjen në një moment tensioni të lartë, pasi transporti detar në këtë zonë është goditur rëndë nga masat e fundit të Shteteve të Bashkuara të Amerikës, të cilat vendosën bllokadë ndaj porteve iraniane pas dështimit të negociatave me Teheranin në Pakistan.
Ngushtica e Hormuzit mbetet një nga arteriet më të rëndësishme energjetike në botë, përmes së cilës kalon një pjesë e madhe e naftës globale, çka e bën çdo zhvillim në këtë zonë me ndikim të drejtpërdrejtë në tregjet ndërkombëtare.
Ndërkohë, konflikti mes SHBA-së dhe Izraelit nga njëra anë dhe Iranit nga ana tjetër, ka hyrë në një fazë të re përshkallëzimi, me sulme të ndërsjella me raketa dhe dronë që kanë rritur ndjeshëm rrezikun për destabilizim të mëtejshëm në rajon.
