Një nga dy pilotët amerikanë të një avioni luftarak F-15, i cili u rrëzua në territorin e Iranit, është nxjerrë i gjallë nga forcat amerikane, sipas raportimeve të NBC News.
Incidenti ndodhi më herët gjatë ditës, ndërsa lajmi për rrëzimin e avionit u publikua fillimisht nga Reuters dhe media të tjera ndërkombëtare. Një zyrtar amerikan, duke folur në kushte anonimiteti, konfirmoi se një prej pilotëve ka arritur të shpëtohet, por nuk dha detaje mbi fatin e pilotit tjetër.
Deri tani, ushtria amerikane nuk ka bërë një reagim zyrtar lidhur me shkaqet e rrëzimit apo rrethanat e ngjarjes.
Ky zhvillim shënon rastin e parë që një avion ushtarak amerikan rrëzohet në Iran që nga nisja e konfliktit aktual. Në fazat e para të përplasjes, tre avionë të tjerë F-15 u rrëzuan aksidentalisht si pasojë e zjarrit miqësor nga mbrojtja ajrore e Kuvajtit.
