Presidenti francez, Emmanuel Macron, ka shprehur qëndrimin e tij kundër një operacioni ushtarak për hapjen e Ngushticës së Hormuzit, duke e cilësuar një skenar të tillë si të parealizueshëm dhe të rrezikshëm.
Deklarata e tij erdhi pas komenteve të Donald Trump, i cili u kishte bërë thirrje aleatëve të ndërhynin për të siguruar kalimin në këtë korridor jetik për tregtinë globale të energjisë. Gjatë një vizite në Korea e Jugut, Macron theksoi se Franca nuk e ka konsideruar asnjëherë përdorimin e forcës si zgjidhje.
Sipas tij, një ndërhyrje e tillë do të ishte e gjatë dhe do të rrezikonte sigurinë e transportit detar, për shkak të kërcënimeve të mundshme nga forcat iraniane dhe sistemet raketore. Ai nënvizoi se rëndësia strategjike e ngushticës për furnizimin me energji dhe tregtinë ndërkombëtare është e padiskutueshme, por zgjidhja duhet të vijë përmes dialogut dhe bashkëpunimit me Iran.
Macron komentoi gjithashtu deklaratat kritike të Trump ndaj NATO-s, duke shmangur përshkallëzimin e retorikës, ndërsa theksoi se Franca synon arritjen e paqes sa më shpejt të jetë e mundur.
Nga ana tjetër, presidenti amerikan nuk kurseu ironitë ndaj homologut francez, duke bërë komente personale edhe për bashkëshorten e tij, Brigitte Macron. Në përgjigje, Macron i cilësoi këto deklarata si të papërshtatshme dhe jashtë kontekstit të situatës aktuale.
