Delegacioni iranian është larguar nga Pakistani me avion, pas një vizite në Islamabad ku zhvilloi takime vetëm me autoritetet pakistaneze, pa u realizuar asnjë kontakt me përfaqësuesit e Shteteve të Bashkuara.
Sipas dy burimeve qeveritare pakistaneze, delegacioni u nis pasi përfundoi diskutimet me zyrtarët vendas. Ministri i Jashtëm i Iranit, Abbas Araghchi, nuk pati asnjë takim me zyrtarët amerikanë, pavarësisht raportimeve për një mundësi dialogu të ndërmjetësuar.
Nga ana e saj, Shtëpia e Bardhë kishte njoftuar se presidenti amerikan Donald Trump kishte dërguar të dërguarit e posaçëm Steve Witkoff dhe Jared Kushner për bisedime në Pakistan me palën iraniane. Megjithatë, Teherani ka deklaruar se nuk ishte planifikuar asnjë takim i drejtpërdrejtë me SHBA-në.
Një burim diplomatik iranian, i cituar nga Reuters, ka theksuar se Irani nuk do të pranojë “kërkesa maksimaliste” në negociata, duke lënë të kuptohet për rezerva të forta ndaj qëndrimeve amerikane.
Ndërkohë, Donald Trump ka deklaruar se Irani ka paraqitur një ofertë që SHBA do ta shqyrtojë, por pa dhënë detaje. Ai ka përsëritur qëndrimin se çdo marrëveshje duhet të përfshijë heqjen dorë të Iranit nga pasurimi i uraniumit dhe garantimin e lëvizjes së lirë të naftës përmes Ngushticës së Hormuzit.
