Kreu i Partisë Demokratike, Sali Berisha, u paraqit këtë të hënë në ambientet e SPAK për të zbatuar masën e sigurisë “detyrim paraqitje”, në kuadër të hetimeve që lidhen me privatizimin e ish-kompleksit “Partizani”.
Pas daljes nga SPAK, Berisha u pyet nga gazetarët nëse do të ishte i gatshëm të merrte pjesë në një seancë gjyqësore ku mund të thirrej edhe kryeministri Edi Rama. Ai u shpreh i hapur për një përballje të drejtpërdrejtë, duke theksuar se nuk ka asnjë hezitim për t’u paraqitur në gjykatë.
Berisha deklaroi se do të mirëpriste një seancë të tillë edhe në prani të kamerave, në mënyrë që, sipas tij, publiku të ndiqte drejtpërdrejt zhvillimet. Megjithatë, ai shtoi se nuk beson që Rama do të pranonte një përballje të tillë, duke e akuzuar për ndikim mbi institucionet e drejtësisë.
Në vijim të deklaratave të tij, lideri demokrat hodhi akuza edhe ndaj prokurorëve dhe gjyqtarëve, duke pretenduar se ata veprojnë nën ndikim politik.
Çështja “Partizani” lidhet me procedurat e privatizimit të ish-kompleksit ushtarak, për të cilën SPAK po zhvillon hetime prej kohësh.
