Sali Berisha, ka ashpërsuar tonet ndaj qeverisë gjatë një takimi me fermerët në Berat, duke akuzuar kryeministrin Edi Rama për mashtrim dhe neglizhencë ndaj sektorit bujqësor.
Gjatë fjalës së tij, Berisha kundërshtoi deklaratat e Ramës se vendet europiane nuk subvencionojnë naftën për fermerët, duke theksuar se, sipas tij, në të gjithë Europën ekzistojnë skema mbështetëse për këtë sektor jetik.
Ai e cilësoi politikën e qeverisë si të dëmshme dhe “armiqësore” ndaj fermerëve, duke paralajmëruar se mungesa e subvencioneve dhe rritja e çmimit të karburantit po e bëjnë punimin e tokës gjithnjë e më pak fitimprurës.
Sipas Berishës, kjo situatë po çon në braktisjen e tokave bujqësore, rritjen e importeve dhe çmime më të larta për produktet ushqimore në treg. Ai shtoi se fermerët shqiptarë po përballen me vështirësi të mëdha ekonomike, ndërsa mbështetja shtetërore mbetet minimale.
Në përfundim, ish-kryeministri theksoi se bujqësia është një nga shtyllat kryesore të ekonomisë dhe kërkoi ndërhyrje të menjëhershme për të mbështetur fermerët dhe për të parandaluar përkeqësimin e mëtejshëm të situatës në këtë sektor.
