Brenda kampit politik pro-Trump po përhapet një valë e re teorish konspirative që vënë në pikëpyetje ngjarjen e rëndë të vitit 2024 në Pensilvani, ku Donald Trump i shpëtoi një atentati gjatë një tubimi elektoral.
Sipas këtyre pretendimeve, të cilat po qarkullojnë në rrethe të caktuara të lëvizjes MAGA, ngjarja mund të ketë qenë e inskenuar ose e mbuluar me paqartësi të qëllimshme. Dyshimet janë ringjallur së fundmi nga ish-deputetja republikane Marjorie Taylor Greene, e cila ka kërkuar publikisht sqarime nga presidenti për episodin që ndryshoi dinamikën e fushatës së tij.
Atentati ndodhi gjatë një mitingu në Butler të Pensilvanisë, ku Trump u plagos lehtë në vesh, ndërsa një pjesëmarrës humbi jetën. Sulmuesi, i identifikuar si Thomas Matthew Crooks, u neutralizua në vend nga forcat e sigurisë.
Megjithatë, një pjesë e mbështetësve të Trump kanë ngritur pikëpyetje mbi mënyrën si u menaxhua siguria, reagimin e agjentëve dhe mungesën e transparencës mbi detaje të incidentit. Këto elemente, sipas tyre, kanë ushqyer dyshime se ngjarja nuk është shpjeguar plotësisht.
Fotografia ikonike e Trumpit duke ngritur grushtin pas të shtënave u bë simbol i fushatës së tij, duke e forcuar imazhin e një lideri të pathyeshëm. Por sot, disa zëra brenda vetë bazës së tij politike po e rihapin debatin, duke pretenduar se shumë pyetje mbeten pa përgjigje.
Greene ka kërkuar publikisht që Trump të japë shpjegime, duke e kthyer çështjen në një debat të ri politik brenda vetë lëvizjes së tij, në një moment kur tensionet dhe ndasitë në kampin republikan po thellohen gjithnjë e më shumë.
