Ushtria Amerikane ka ndërmarrë një hap të rëndësishëm për të përballuar krizën e rekrutimit, duke rritur moshën maksimale për regjistrim në 42 vjeç dhe duke lehtësuar kriteret për personat me dënime të lehta për posedim droge.
Sipas rregullores së re, individët deri në këtë moshë mund të regjistrohen në ushtri, në Gardën Kombëtare dhe në rezervat, duke tejkaluar kufirin e mëparshëm prej 35 vjeç.
Një tjetër ndryshim i rëndësishëm është heqja e kufizimeve për aplikantët që kanë një dënim të vetëm për posedim të marijuanës ose pajisjeve të lidhura me të. Më parë, këta persona duhej të merrnin një përjashtim të veçantë nga Pentagoni dhe të prisnin deri në 24 muaj për t’u regjistruar.
Këto masa vijnë pas vështirësive të vazhdueshme në rekrutime, ku ushtria nuk arriti objektivat me rreth 25% në vitin 2022. Ndryshimet synojnë të zgjerojnë bazën e aplikantëve, përfshirë edhe gjeneratat më të reja, por edhe kandidatët më të pjekur në moshë.
Ekspertët, përfshirë analistët e RAND Corporation, kanë sugjeruar se rekrutët më të vjetër shpesh janë më të motivuar, më të fokusuar dhe më të gatshëm për trajnimin bazë, çka mund të ndikojë pozitivisht në cilësinë e forcave të armatosura.
