Një sulm me raketë ka goditur Ambasadën e Shteteve të Bashkuara në Bagdad, sipas një zyrtari të lartë të sigurisë irakiane. Një gazetar i Agjencisë France Presse raportoi se mbi kompleksin diplomatik në qendër të kryeqytetit irakian u pa të ngrihej tym i zi pas shpërthimit.
Ky është sulmi i dytë ndaj Ambasadës amerikane në Bagdad që nga nisja e përshkallëzimit të konfliktit mes Shteteve të Bashkuara, Izraelit dhe Iranit.
Sipas raportimit të Associated Press, një raketë ka goditur një platformë për uljen e helikopterëve brenda kompleksit diplomatik. Ndërkohë, Agjencia France Presse citon burime sipas të cilave objekti mund të jetë goditur edhe nga një dron.
Sulmi ndodhi pak pasi dy luftëtarë të mbështetur nga Irani u vranë në sulme ajrore në kryeqytetin irakian. Sipas burimeve të cituara nga Agjencia France Presse, njëri prej tyre besohet të ketë qenë një figurë e rëndësishme në rrjetin e grupeve të lidhura me Teheranin.
Ndërkohë, disa grupe të armatosura pro-iraniane, të bashkuara nën ombrellën e Lëvizjes Islamike të Rezistencës në Irak, kanë marrë përgjegjësinë për sulmet e vazhdueshme me raketa dhe dronë kundër bazave amerikane në rajon.
