Një situatë alarmante është krijuar në Ngushticën e Hormuzit, duke paralizuar një nga korridoret më të rëndësishme të transportit detar në botë.
Sipas Organizatës Ndërkombëtare Detare, rreth 20 mijë marinarë kanë mbetur të bllokuar në zonë, ndërsa afro 2 mijë anije nuk janë në gjendje të vazhdojnë lundrimin.
Sekretari i përgjithshëm i IMO-s, Arsenio Dominguez, paralajmëroi se situata po rëndohet çdo ditë, me ekuipazhet që përballen me stres të lartë, lodhje ekstreme dhe mungesë furnizimesh bazë.
Kriza po ndikohet edhe nga kompanitë e sigurimeve, të cilat po refuzojnë të mbulojnë rreziqet në zonë ose po vendosin tarifa shumë të larta, duke e bërë thuajse të pamundur vijimin normal të aktivitetit detar.
Megjithëse deri tani është shmangur një krizë e plotë humanitare falë ndihmës nga vendet përreth, organizmat ndërkombëtarë kërkojnë urgjentisht krijimin e një korridori humanitar që do të lejonte largimin e anijeve dhe sigurinë e ekuipazheve.
Kjo situatë rrezikon të ketë pasoja të mëdha për tregtinë globale, duke qenë se Ngushtica e Hormuzit është një nga rrugët kryesore për transportin e naftës dhe mallrave në nivel botëror.
