Presidenti i SHBA-së, Donald Trump, deklaroi se programi raketor i Iranit përbën një kërcënim serioz për rajonin dhe për interesat amerikane, duke theksuar se operacionet ushtarake të SHBA-së do të vazhdojnë.
Gjatë një fjalimi në Dhomën Lindore, Trump u shpreh se programi raketor iranian ishte ndërtuar për të mbrojtur zhvillimin e armëve bërthamore. Ai paralajmëroi se një Iran i pajisur me armë bërthamore dhe raketa me rreze të gjatë veprimi do të përbënte një kërcënim të papranueshëm për Lindjen e Mesme dhe për qytetarët amerikanë.
Sipas tij, Teherani tashmë zotëron raketa që mund të arrijnë Evropën dhe bazat amerikane, ndërsa në të ardhmen mund të zhvillojë kapacitete për të goditur drejtpërdrejt territorin e SHBA-së. Trump theksoi se qëllimi i operacioneve aktuale është eliminimi i këtyre kërcënimeve dhe parandalimi i forcimit të mëtejshëm të programit bërthamor iranian.
Fjalimi i presidentit erdhi gjatë një ceremonie për nderimin e tre ushtarakëve amerikanë me Medaljen e Nderit, por ai e shfrytëzoi rastin për të dhënë një “përditësim të shkurtër” mbi Operacionin “Epic Fury”, duke theksuar se ushtria amerikane po kryen operacione luftarake në shkallë të gjerë kundër objektivave iraniane.
