Një zyrtar i lartë amerikan ka deklaruar se kombëtarja e Iranit në futboll do të jetë e sigurt dhe e mirëpritur në Shtetet e Bashkuara, nëse merr pjesë në Kupën e Botës që zhvillohet këtë verë.
Andrew Giuliani, drejtues i grupit të punës për Kupën e Botës në Shtëpinë e Bardhë, tha për BBC se aktualisht pritet që ekipi iranian të udhëtojë drejt SHBA-së për ndeshjet e fazës së grupeve.
“Tani për tani, presim që ekipi iranian të vijë. Kjo është një mundësi e shkëlqyer për diasporën iraniane në SHBA që të festojë vendin e tyre,” u shpreh ai gjatë një aktiviteti në Teksas.
Sipas planifikimit, Irani do të zhvillojë ndeshjet e grupit në Los Angeles dhe Seattle.
Deklarata vjen pas polemikave të shkaktuara nga presidenti Donald Trump, i cili dy javë më parë kishte shprehur dyshime mbi përshtatshmërinë e udhëtimit të ekipit iranian në SHBA për shkak të shqetësimeve të sigurisë.
Pas kësaj, autoritetet iraniane kërkuan zhvendosjen e ndeshjeve në Meksikë, por kërkesa u refuzua nga FIFA.
Giuliani sqaroi se qëndrimi zyrtar mbetet në favor të pjesëmarrjes së Iranit, ndërsa deklaratat e mëparshme të Trump lidhen me zhvillime të tjera, përfshirë situatën e ekipit kombëtar të femrave iraniane.
Megjithatë, ai paralajmëroi se mbyllja e vazhdueshme e Departamentit të Sigurisë Kombëtare në SHBA mund të ndikojë në organizimin e turneut, duke theksuar nevojën për garantimin e një eventi të sigurt dhe të suksesshëm.
