Tensionet në Lindjen e Mesme vijojnë të përshkallëzohen, ndërsa ministri i Jashtëm i Iranit, Abbas Araghchi, ka lëshuar një paralajmërim të fortë ndaj çdo shteti që mbështet përpjekjet për rihapjen e Ngushticës së Hormuzit.
Në një reagim të ashpër diplomatik, ai deklaroi se çdo ndërhyrje për të zhbllokuar këtë korridor jetik detar do të konsiderohet si pjesë e një agresioni të drejtpërdrejtë kundër Iranit. Sipas tij, vendet që rreshtohen në këtë nismë do të mbajnë përgjegjësi të plotë për pasojat që mund të pasojnë.
Komentet e Araghchit erdhën gjatë një bisede telefonike me ministrin e Jashtëm të Japonisë, Toshimitsu Motegi, ku ai e bëri të qartë qëndrimin e Teheranit për situatën e krijuar.
Diplomati iranian e lidhi drejtpërdrejt krizën aktuale me veprimet e Shteteve të Bashkuara dhe Izraelit, duke i akuzuar ato si shkaktarë të tensioneve në rajon dhe të përshkallëzimit të situatës.
Sipas tij, çdo përpjekje për të thyer bllokadën në Ngushticën e Hormuzit nuk do të shihet si një akt neutral, por si bashkëpunim i drejtpërdrejtë me veprime armiqësore kundër Iranit.
Deklaratat e forta nga Teherani vijnë në një moment kritik për tregjet globale të energjisë dhe sigurinë ndërkombëtare, duke rritur frikën për një përplasje më të gjerë që mund të përfshijë aktorë të shumtë globalë.
