Ish-presidenti i Venezuelës, Nicolás Maduro, pritet të paraqitet sot në një gjykatë federale në New York, ku do të përballet me akuzat për konspiracion dhe trafik droge. Avokati i tij pretendon se SHBA-ja po shkel të drejtat kushtetuese të liderit të rrëzuar duke bllokuar përdorimin e fondeve të qeverisë venezueliane për të paguar shpenzimet ligjore.
Është hera e parë që Maduro dhe bashkëshortja e tij, Cilia Flores, do të jenë në gjykatë që nga seanca e janarit, ku ata deklaruan pafajësinë e tyre dhe kundërshtuan kapjen nga forcat amerikane. “Unë jam i pafajshëm. Nuk jam fajtor. Jam një njeri i ndershëm, presidenti kushtetues i vendit tim”, tha Maduro atëherë. Flores gjithashtu është deklaruar e pafajshme.
Ndërkohë, roli i Maduros në politikën venezueliane ka zbehur dukshëm. Nën drejtimin e presidentes Delcy Rodriguez, shumë ministra dhe zyrtarë të lartë janë zëvendësuar, janë riorganizuar agjencitë dhe janë riformuluar marrëdhëniet diplomatike me SHBA-në, duke përfshirë lehtësimin e disa sanksioneve ndaj industrisë së naftës.
Megjithatë, Maduro dhe Flores mund të detyrohen të paguajnë vetë shpenzimet e tyre ligjore, ndërsa procesi gjyqësor vazhdon në SHBA. Ndërkohë, qytetarët venezuelianë përballen me vështirësi ekonomike dhe sociale, pa përfitime të dukshme nga “momentet e reja politike” që Rodriguez ka përshkruar.
