Në fillim të muajit mars, një avion transporti izraelit u nis nga Tel Aviv drejt Beograd dhe u kthye sërish në shtetin hebre, sipas të dhënave të Radio Evropa e Lirë dhe faqeve për ndjekjen e fluturimeve.
Avioni, i specializuar për ngarkesa të rënda dhe potencialisht të rrezikshme, dyshohet të ketë transportuar armë, megjithëse nuk ka konfirmim zyrtar për llojin ose sasinë e ngarkesës. Kompania private izraelite Challenge Airlines IL ka kryer të paktën nëntë fluturime mes Serbisë dhe Izraelit gjatë muajit të fundit, përfshirë dy fluturime pas përshkallëzimit të konfliktit izraelito-iranian më 28 shkurt 2026.
Pyetjet e REL drejtuar ministrive serbe dhe kompanisë mbetën pa përgjigje. Serbia kishte pezulluar eksportin e armëve në qershor 2025 pas një urdhri të presidentit Aleksandar Vuçic, por informacionet nga dy fabrika shtetërore tregojnë se eksporti rifilloi në shkurt 2026.
Të dhënat zyrtare mbi eksportet e armëve janë të pakta dhe sekretet për destinacionin, sasitë dhe llojet e municioneve mbeten të panjohura. Në vitin 2025, Serbia eksportoi armë dhe municione me vlerë rreth 50 milionë dollarë, gjysma e nivelit të vitit 2024. Aeroporti i Beogradit nuk ka dhënë detaje mbi ngarkesat e avionëve që lidhen me Izraelin, duke theksuar vetëm se përdorimi i infrastrukturës bëhet sipas rregulloreve ndërkombëtare dhe kombëtare.
Sipas REL, edhe gjatë moratoriumit për eksportin e armëve nga Serbia, disa dërgesa janë kryer fshehurazi drejt vendeve si Azerbajxhan dhe Qipro. Ligjërisht, eksportet e armëve kërkojnë miratim nga disa ministri dhe certifikatë nga përdoruesi i fundit për të shmangur shkeljen e sanksioneve ndërkombëtare dhe për të parandaluar konflikte të armatosura, por mungesa e transparencës e vështirëson ndjekjen e këtyre operacioneve.
Ky zhvillim rrit dyshimet për përfshirjen e Serbisë dhe Izraelit në transport të armëve gjatë tensioneve në Lindjen e Mesme, duke vënë në pah mungesën e kontrollit publik mbi fluturimet
