Teksa konflikti mes SHBA-së, Izraelit dhe Iranit ka hyrë në javën e katërt, tensionet politike në Uashington janë shtuar. Senatori demokrat Chris Van Hollen ka akuzuar presidentin Donald Trump se po mashtron publikun lidhur me pretendimet për negociata me Teheranin.
Në një intervistë për CNN, Van Hollen deklaroi se nuk ka prova që Irani është i përfshirë në bisedime reale apo se është i gatshëm të pranojë kërkesat e SHBA-së për t’i dhënë fund konfliktit. “Ne e dimë që ai po gënjen,” u shpreh senatori.
Sipas tij, pretendimet për “bisedime” lidhen me kontakte të paqarta dhe jozyrtare, të cilat përfshijnë kërkesa të forta ndaj Iranit, si ndalimi i pasurimit të uraniumit, dorëzimi i rezervave ekzistuese dhe rihapja e Ngushticës së Hormuzit për transportin ndërkombëtar të naftës.
Van Hollen paralajmëroi gjithashtu se një sulm i mundshëm amerikan ndaj infrastrukturës energjetike iraniane, përfshirë objektiva strategjike si ishulli Kharg, mund të konsiderohet shkelje e ligjit ndërkombëtar dhe të klasifikohet si krim lufte.
Nga ana tjetër, Donald Trump ka deklaruar në platformën Truth Social se bisedimet me Iranin po zhvillohen në mënyrë “shumë të mirë dhe produktive”, duke njoftuar edhe një pezullim pesë-ditor të sulmeve ndaj objekteve energjetike iraniane.
Megjithatë, zyrtarët iranianë, përfshirë kryetarin e parlamentit Mohammad Bagher Ghalibaf dhe zëdhënësin e diplomacisë Ismail Baghaei, i kanë hedhur poshtë kategorikisht këto pretendime, duke theksuar se nuk ka pasur asnjë formë negociate me SHBA-në.
