Presidenti amerikan Donald Trump ka konfirmuar se ushtria e Shteteve të Bashkuara ka nisur “operacione të mëdha luftarake” kundër Iranit, duke e futur situatën në Lindjen e Mesme në një fazë kritike përshkallëzimi.
Deklarata e tij erdhi përmes një videoje tetëminutëshe të publikuar në platformën Truth Social, ku theksoi se qëllimi i operacionit është “mbrojtja e popullit amerikan dhe eliminimi i kërcënimeve të menjëhershme nga regjimi iranian”.
“Për 47 vjet, regjimi iranian ka bërtitur ‘Vdekje Amerikës’ dhe ka zhvilluar një fushatë të pafundme gjakderdhjeje, duke vënë në rrezik trupat tona, bazat tona jashtë vendit dhe aleatët tanë në mbarë botën”, deklaroi Trump.
Paralelisht, ushtria izraelite ka nisur një sulm të befasishëm ndaj Teheranit, në atë që raportohet si operacion i koordinuar me SHBA-në. Hapësira ajrore izraelite është mbyllur për arsye sigurie, ndërsa janë pezulluar aktivitetet arsimore dhe tubimet publike. Qytetarëve u është rekomanduar të punojnë nga shtëpia.
Raportime të pakonfirmuara flasin për një sulm ndaj rezidencës së presidentit iranian dhe për largimin e udhëheqësit suprem Ali Khamenei nga qyteti. Po ashtu, në Iran raportohen ndërprerje të rrjetit celular dhe probleme me internetin.
Situata mbetet jashtëzakonisht e tensionuar, ndërsa komuniteti ndërkombëtar ndjek me shqetësim zhvillimet që mund të çojnë në një konflikt të hapur në shkallë të gjerë.
