Presidenti i SHBA-së, Donald Trump, ka shprehur hapur mbështetjen për rizgjedhjen e kryeministrit hungarez Viktor Orban, vetëm pak përpara zgjedhjeve që do të mbahen më 12 prill në Hungari, duke e cilësuar atë një lider “të fuqishëm” dhe partner kyç të Uashingtonit.
Në një postim në platformën e tij Truth Social, Trump theksoi se kishte mbështetur Orbanin edhe në zgjedhjet e vitit 2022 dhe se është “i nderuar” ta bëjë këtë sërish. Ai i atribuoi kryeministrit hungarez forcimin e ndjeshëm të marrëdhënieve SHBA–Hungari, duke deklaruar se bashkëpunimi dypalësh arriti “nivele të reja suksesi” gjatë administratës së tij, kryesisht falë rolit të Orbanit.
Trump shtoi se pret të vazhdojë bashkëpunimin e ngushtë me Orbanin edhe në të ardhmen, duke e përforcuar imazhin e liderit hungarez si një nga aleatët e tij më të afërt në Evropë. Orban prej kohësh është konsideruar figurë e preferuar nga Trump dhe qarqe konservatore amerikane, të cilat e kanë ftuar shpesh në aktivitete politike dhe e kanë paraqitur modelin e tij të qeverisjes si shembull.
Mbështetje edhe për Japoninë
Në të njëjtën linjë, Trump ka dhënë mbështetje edhe për kryeministren japoneze Sanae Takaichi, në prag të zgjedhjeve legjislative të së dielës. Ai e përshkroi atë si një udhëheqëse “të fuqishme dhe të mençur”, duke vlerësuar punën e saj dhe të koalicionit qeverisës.
Në deklaratën e tij, Trump theksoi se është “nder” për të si president i SHBA-së të ofrojë mbështetje të plotë për Takaichi dhe koalicionin që ajo përfaqëson, ndërsa bëri të ditur se pret ta presë atë në Shtëpinë e Bardhë më 19 mars.
Daljet e Trump përbëjnë një tjetër shembull të përfshirjes së drejtpërdrejtë të tij në dinamikat elektorale ndërkombëtare — një qasje që tradicionalisht është shmangur nga politikanët amerikanë, por që ai e ka sfiduar vazhdimisht gjatë karrierës së tij politike.
