Sekretari i Përgjithshëm i NATO, Mark Rutte, u bëri thirrje vendeve evropiane anëtare të përqendrohen në përmbushjen e angazhimeve për rritjen e shpenzimeve të mbrojtjes, duke theksuar se nuk ka arsye për dyshime mbi përkushtimin e Shteteve të Bashkuara ndaj aleancës.
Në një konferencë të përbashkët për shtyp në Bruksel me kryeministren e Lituanisë, Inga Ruginiene, Rutte theksoi se prioritet duhet të jetë zbatimi i vendimeve të marra në samitin e NATO-s në Hagë, sidomos sa i përket rritjes së buxheteve ushtarake.
“Evropianët duhet të ndalojnë së shqetësuari për SHBA-në dhe të bëjnë maksimumin për të përmbushur premtimet e tyre. Kjo na forcon dhe e ankoron edhe më shumë Amerikën në NATO,” u shpreh ai.
Rutte theksoi se SHBA mbetet plotësisht e përkushtuar ndaj Nenit 5, parimit të mbrojtjes kolektive, duke siguruar se çdo sulm ndaj një vendi anëtar konsiderohet sulm ndaj të gjithëve.
Ai vuri në dukje rritjen e ndjeshme të shpenzimeve të mbrojtjes në Evropë, duke përmendur faktin se Lituania ka ndarë rreth 5,4% të PBB-së për mbrojtjen thelbësore, ndërsa Gjermania planifikon të dyfishojë buxhetin ushtarak në vitet e ardhshme.
Sipas tij, NATO është aktualisht më e fortë se në çdo periudhë që nga rënia e Murit të Berlinit në vitin 1989, ndërsa aleatët po rikthehen fuqishëm te misioni bazë i parandalimit dhe mbrojtjes.
Sa i përket mbrojtjes ajrore, Rutte theksoi se rajoni i Baltikut është prioritet, me plane për të rritur kapacitetet territoriale të mbrojtjes ajrore me rreth 400% në të ardhmen.
I pyetur për qëndrimin e Hungaria lidhur me kreditë e BE-së për Ukrainën dhe sanksionet ndaj Rusisë, ai e cilësoi Hungarinë si një aleat të rëndësishëm, duke shmangur komentet publike mbi diskutimet me kryeministrin Viktor Orban.
Nga ana e saj, Ruginiene theksoi se mbështetja për Ukrainën është thelbësore dhe se NATO mbetet shtylla kryesore e sigurisë së vendit të saj përballë presioneve të vazhdueshme ushtarake dhe hibride, duke u bërë thirrje aleatëve të synojnë të paktën 3,5% të PBB-së për mbrojtje.
