Kryeministri i Spanjës, Pedro Sanchez, ka bërë të ditur se Madridi zyrtar nuk do të marrë pjesë në Bordin e Paqes për Gazën, iniciativë e ndërmarrë nga Shtetet e Bashkuara. Lajmi u konfirmua nga shërbimi për shtyp i Kabinetit të Ministrave të Mbretërisë së Spanjës.
Sipas njoftimit zyrtar, vendimi i qeverisë spanjolle lidhet me qëndrimin e saj të palëkundur në mbështetje të rendit shumëpalësh, ligjit ndërkombëtar dhe rolit qendror të Kombeve të Bashkuara në zgjidhjen e konflikteve.
Pedro Sanchez theksoi se e ardhmja e Palestinës duhet të përcaktohet nga vetë palestinezët, ndërsa bashkëjetesa paqësore dhe e sigurt me Izraelin duhet të arrihet përmes dialogut mes palëve, në kuadër të zgjidhjes me dy shtete.
“E ardhmja e Palestinës dhe e marrëdhënieve të saj me Izraelin duhet të ndërtohet përmes një procesi dialogu të bazuar në të drejtën ndërkombëtare”, u shpreh Sanchez.
Ndërkohë, presidenti amerikan Donald Trump ka deklaruar se iniciativa e Bordit të Paqes ka marrë mbështetjen e disa vendeve të tjera. Projekti, i ndërtuar fillimisht mbi një marrëveshje mes Izraelit dhe Hamasit për administrimin e Gazës, synon gjithashtu të shtrihet në parandalimin dhe zgjidhjen e konflikteve në rajone të tjera.
