Kryetari i Partisë Demokratike, Sali Berisha, ka lëshuar akuza të ashpra ndaj qeverisë në lidhje me projektin “Smart City”, duke e cilësuar atë si një aferë të pastër korruptive me kosto shumëfish më të larta se vlerat reale të tregut.
Në një konferencë për mediat, Berisha deklaroi se projekti përbën jo vetëm një vjedhje masive të fondeve publike, por edhe një rrezik serioz për sigurinë kombëtare dhe privatësinë e qytetarëve. Ai paralajmëroi se Partia Demokratike do ta çojë çështjen në institucionet ndërkombëtare, duke e konsideruar si një shkelje të rëndë të të drejtave të njeriut.
Sipas Berishës, pajisjet e parashikuara në projekt janë faturuar me çmime nga 10 deri në 30 herë më të larta se ato që gjenden në treg. Ai solli si shembull kamerat e trupit për policinë, të cilat sipas tij janë parashikuar me një kosto prej 15.700 euro, ndërkohë që në treg kushtojnë 1.000–1.500 euro. Po ashtu, kamerat rrugore janë vlerësuar me 52 mijë euro, kur çmimi real i tyre nuk i kalon 2 mijë euro.
Berisha theksoi se, në tërësi, kostoja e projektit “Smart City” në Shqipëri rezulton 10 deri në 12 herë më e lartë krahasuar me projekte të ngjashme në vende të tjera. Ai krahasoi projektin me rastin e qytetit Bangalore në Indi, ku sipas tij, një projekt i tillë për një popullsi prej 8 milionë banorësh ka kushtuar 67 milionë dollarë, ndërsa në Shqipëri, për më pak se 2 milionë banorë, kostoja arrin në 157 milionë euro.
Kreu i PD-së e cilësoi këtë projekt si një skemë grabitjeje të papërmbajtur dhe një mekanizëm të kontrollit total mbi qytetarët, duke e krahasuar atë me një “sy që ndjek çdo lëvizje”. Ai akuzoi qeverinë për përfshirje të lidhjeve klienteliste dhe paralajmëroi se opozita do të ndërmarrë çdo hap për ta denoncuar çështjen edhe në arenën ndërkombëtare.
