Anthony Joshua e mbylli pa mëshirë spektaklin ndaj Jake Paul me një të djathtë shkatërruese në raundin e gjashtë, duke vendosur rregull në ring. Një duel i pabarabartë në boks që u mbyll siç pritej: përvoja dhe fuqia kundër iluzionit të sensacionit.
Boksieri britanik i peshës së rëndë Anthony Joshua i dha fund spektaklit të shumëpërfolur ndaj Jake Paul pas gjashtë raundesh, në një duel që u shndërrua shpejt në simbol të pabarazisë më të theksuar që ka parë ring-u modern.
Joshua u përball me një kundërshtar që zgjodhi mbijetesën në vend të përplasjes, duke lëvizur vazhdimisht rreth ringut dhe duke shmangur kontaktin, çka e bëri kampionin britanik të shfaqej i irrituar për pjesë të gjata të ndeshjes.
Megjithatë, përvoja dhe fuqia e dy herë kampionit të botës folën në raundin e pestë, kur Paul u rrëzua dy herë brenda pak minutash.
Goditja vendimtare erdhi në raundin e gjashtë: një e djathtë e pastër dhe shkatërruese e Joshua-s, që i dha fund menjëherë një nate surreale në Kaseya Center në Miami.
Paul nuk arriti të çohej brenda numërimit, ndërsa në arenë u ndje një lehtësim i dukshëm kur amerikani u ngrit në këmbë dhe u largua pa ndihmë mjekësore.
“Nuk ishte performanca ime më e mirë,” pranoi Joshua pas ndeshjes.
Rezultati ishte ai që shumica e botës së boksit kishte parashikuar, por përballja hapi sërish debat mbi rreziqet e sigurisë që sjellin duelet me diferenca kaq të mëdha në përvojë, peshë dhe fuqi.
Me fitoren e 29-të në 33 ndeshje profesionale, Joshua tani mund të kthejë vëmendjen te sfida më legjitime dhe e shumëpërfolur: përballja me Tyson Fury, e cila pritet të jetë një nga duelet më të mëdha të vitit të ardhshëm.
Nga ana tjetër, Jake Paul dështoi të realizojë “sensacionin e shekullit”.
28-vjeçari u përball me realitetin brutal të boksit elitar, duke kaluar pjesën më të madhe të ndeshjes në tapet ose i kapur pas këmbëve të kundërshtarit, një pasqyrim i qartë i hendekut të madh mes spektaklit dhe sportit të vërtetë.
