Banorët e Kolonjës janë përballur me një situatë shqetësuese pasi, pavarësisht investimeve të mëdha në sistemet e ujësjellësit, uji që u vjen në shtëpi rezulton i papijshëm. Sipas njoftimit zyrtar të Bashkisë, qytetarëve u kërkohet të mos e përdorin ujin për konsum, derisa të përfundojnë verifikimet dhe ndërhyrjet e nevojshme.
Ky zhvillim ka shkaktuar indinjatë në komunitet, pasi projektet e financuara me miliona euro kishin si synim përmirësimin e cilësisë së ujit dhe furnizimin e sigurt për familjet e zonës. Tani banorët ndihen të zhgënjyer, duke kërkuar sqarime se si pas investimeve kaq të mëdha, cilësia e ujit vazhdon të jetë problematike.
Bashkia ka deklaruar se po punon për të zbuluar shkakun e ndotjes dhe premton marrjen e masave urgjente për rikthimin e furnizimit me ujë të sigurt. Deri atëherë, qytetarëve u rekomandohet të përdorin burime alternative për pije dhe gatim.
Situata ngre pikëpyetje serioze mbi menaxhimin e fondeve publike dhe cilësinë e punimeve të kryera, duke e kthyer këtë çështje në një nga skandalet më të mëdha lokale të viteve të fundit.
Autoritetet bëjnë thirrje që uji i rrjetit të mos përdoret për konsum deri në një njoftim të dytë, teksa njoftohet se po punohet intensivisht për normalizimin e situatës dhe çdo informacion i ri do të bëhet menjëherë i ditur për publikun.
“NJVKSH Kolonjë bën me dije se, si pasojë e reshjeve intensive të ditëve të fundit, analizat e kryera mbi ujin e rrjetit të qytetit kanë treguar prezencë ndotjeje mikrobike dhe fiziko–kimike. Uji i rrjetit nuk duhet të përdoret për konsum deri në një njoftim të dytë. Po punohet për normalizimin e situatës dhe çdo informacion i ri do të bëhet menjëherë i ditur për publikun”-, shprehet bashkia.
