Ukraina ka testuar me sukses një raketë të re me një rreze veprimi prej 3,000 kilometrash, tha presidenti Volodymyr Zelensky, duke shtuar se pavarësisht kësaj, Rusia po forcon forcat e saj në frontin jugor.
“Raketa i ka kaluar me sukses testet. Aktualisht është raketa jonë më e suksesshme: mund të fluturojë 3,000 kilometra, që është domethënëse”, tha Zelesnky në një deklaratë të lëshuar sot për mediat.
Presidenti ukrainas shtoi se prodhimi në shkallë të gjerë i raketës – e quajtur Flamingo – mund të fillojë deri në shkurt. Lidhur me manovrat e Moskës në front, Zelensky ka paralajmëruar trupat në Zaporizhzhia se armiku po forcohet.
“Mund të shohim se ata po vazhdojnë të transferojnë disa nga trupat e tyre nga zona e Kurskut në Zaporizhzhia”, ka shtuar ai.
Duke komentuar sulmin masiv rus me raketa dhe dronë të mbrëmshëm, presidenti ukrainas shkroi në Facebook: “Ushtria ruse ka vendosur një nga anti-rekordet e saj të çmendura. Ajo ka synuar infrastrukturën civile, ndërtesat e banimit dhe popullsinë tonë”.
Rusia, njoftoi më parë Forca Ajrore e Kievit, lëshoi 40 raketa dhe 574 dronë në Ukrainë gjatë natës.
Presidenti Zelensky njoftoi gjithashtu se i kishte kërkuar Presidentit Donald Trump të bindte Viktor Orban që Hungaria të ndalonte bllokimin e pranimit të Ukrainës në BE. Dje, doli se Trump e telefonoi Orbanin për ta nxitur atë të hiqte të gjitha pengesat për pranimin e Kievit në BE.
