Kryeministri kanadez Mark Carney akuzoi Izraelin të enjten vonë në mbrëmje për pengimin e ndihmës humanitare në Gaza dhe u bëri thirrje agjencive ndërkombëtare të marrin përsipër të gjithë shpërndarjen.
“Kontrolli i Izraelit mbi shpërndarjen e ndihmës duhet të zëvendësohet nga një ofrim gjithëpërfshirës i ndihmës humanitare të udhëhequr nga organizatat ndërkombëtare. Shumë prej këtyre organizatave mbajnë ndihma të konsiderueshme të financuara nga Kanadaja, të cilat janë bllokuar nga shpërndarja tek civilët e uritur. Ky mohim i ndihmës humanitare është një shkelje e së drejtës ndërkombëtare”, tha Carney.
Ndihma humanitare në Gaza aktualisht ofrohet nëpërmjet përpjekjeve tradicionale ndërkombëtare të udhëhequra kryesisht nga Kombet e Bashkuara dhe Fondacioni Humanitar i Gazës i sapokrijuar, i mbështetur nga SHBA-të, i cili vepron nën mbikëqyrjen e sigurisë izraelite. Megjithatë, shpërndarja mbetet shumë e kufizuar nga kontrollet e sigurisë izraelite, me vonesa të shpeshta, bllokime në kalimet kufitare dhe raste të shumta të palestinezëve të vrarë në pikat e ndihmës.
Komentet e Carney erdhën vetëm disa orë pasi Presidenti francez Emmanuel Macron njoftoi se Franca do ta njohë zyrtarisht shtetësinë palestineze në Asamblenë e Përgjithshme të OKB-së në shtator, ndërsa Evropa ashpërson qëndrimin e saj retorik kundër Izraelit.
Lëvizja e Macron shkaktoi reagime të ashpra nga Izraeli dhe SHBA-të. Kryeministri izraelit Benjamin Netanyahu e dënoi atë si një “shpërblim për terrorin”, ndërsa Sekretari i Shtetit i SHBA-së Marco Rubio e quajti atë një “vendim të pamatur” dhe “një shuplakë në fytyrë” për viktimat e sulmeve të Hamasit më 7 tetor.
Carney përsëriti gjithashtu thirrjen e Kanadasë për një armëpushim të menjëhershëm dhe i kërkoi Hamasit të lirojë të gjithë pengjet e marra në sulmin fillestar ndaj Izraelit.
Ai i bëri presion Izraelit që të respektojë integritetin territorial të Bregut Perëndimor dhe Gazës dhe riafirmoi mbështetjen e Kanadasë për një zgjidhje me dy shtete në Lindjen e Mesme.
“Kanadaja do të punojë intensivisht në të gjitha forumet për të çuar më tej këtë qëllim, përfshirë pjesëmarrjen e Ministrit të Punëve të Jashtme në Konferencën e Nivelit të Lartë të OKB-së mbi një Zgjidhje me Dy Shtete në Nju Jork javën e ardhshme”, përfundoi ai.
