Sekretari amerikan i Mbrojtjes, Pete Hegseth, është përballur me një seri pyetjesh të ashpra nga gazetarët në lidhje me mundësinë që Irani të ketë zhvendosur uranium të pasuruar nga objekti bërthamor i Fordow para sulmeve ajrore të SHBA-së.
Spekulimet u ndezën pas publikimit të imazheve satelitore që tregojnë kamionë të rreshtuar jashtë objektit në ditët para sulmit. Ky detaj ka ngritur dyshime serioze se materiali bërthamor mund të jetë nxjerrë nga objekti përpara se të goditej nga avionët amerikanë.
Gjatë konferencës për shtyp, tensionet arritën kulmin kur Hegseth u përplas drejtpërdrejt me Jennifer Griffin, korrespondenten kryesore të sigurisë kombëtare në Fox News. Në fillim, ai deklaroi: “Nuk kam parë asgjë që të sugjerojë se nuk kemi goditur pikërisht atë që donim të godisnim.”
Kur Griffin e nguli pyetjen për sigurinë se uraniumi nuk ishte zhvendosur, ai u përgjigj: “Sigurisht që po monitorojmë çdo aspekt.” Por më pas e akuzoi atë për raportim të pasaktë dhe për shtrembërim të qëllimshëm të deklaratave presidenciale.
Griffin reagoi me forcë, duke mbrojtur punën e saj dhe duke kujtuar se ajo ishte e para që raportoi me saktësi mbi pjesëmarrjen e bombarduesve B-2, procesin e furnizimit në ajër dhe detajet e misionit.
Edhe një reporter i tretë e shtyu më tej çështjen, por Hegseth u përgjigj: “Nuk jam në dijeni të ndonjë informacioni të inteligjencës që të sugjerojë se materialet janë zhvendosur apo nuk kanë qenë aty ku pritej të ishin.”
