Një ngjarje e jashtëzakonshme ndodhi pas fitores 3-0 të Uzbekistanit ndaj Katarit, që vulosi kualifikimin historik të ekipit kombëtar të futbollit në Kupën e Botës 2026. Me urdhër të Presidentit të vendit, Shavkat Mirzijojev, 40 makina elektrike të markës BYD u dorëzuan si dhuratë për lojtarët dhe stafin teknik të ekipit.
Menjëherë pas vërshëllimës së fundit në stadiumin e Tashkentit, automjetet zbarkuan në fushë në një skenë emocionuese që simbolizoi vlerësimin maksimal të shtetit për arritjen e futbollistëve uzbekë.
Ky nuk është rasti i parë që Presidenti Mirzijojev shpërblen ekipet kombëtare për sukseset e tyre. Në vitin 2023, pas fitores së Kupës së Azisë nga ekipi U20 i Uzbekistanit, ai u dhuroi 33 makina anëtarëve të skuadrës.
Kualifikimi në Kupën e Botës 2026 përfaqëson një moment historik për futbollin uzbek, i cili tani synon të lërë gjurmë në skenën më të madhe të futbollit botëror.
