Presidenti amerikan Donald Trump do të vizitojë Lindjen e Mesme muajin e ardhshëm në një turne në tre vende, tha të martën zëdhënësja e tij Karoline Leavitt.
“Ai do të udhëtojë në Arabinë Saudite, Katar dhe Emiratet e Bashkuara Arabe nga 13 maji deri më 16 maj”, tha Leavitt në një konferencë për shtyp në Shtëpinë e Bardhë.
Udhëtimi supozohej të ishte vizita e parë e huaj e Trump, por vdekja e Papa Françeskut të hënën do ta çojë atë në Romë këtë fundjavë për të marrë pjesë në funeralin e Papës.
Trump do të niset nga Uashingtoni të premten në mëngjes për ngjarjen solemne dhe do të kthehet në SHBA të shtunën pas shërbimit funeral.
Të enjten, Trump do të presë kryeministrin norvegjez Jonas Gahr Store në Shtëpinë e Bardhë për një vizitë pune në atë që do të shënojë vizitën e 13-të të një kreu të shtetit të huaj që kur presidenti mori detyrën në janar.
