Nga Namir Lapardhaja
Elbasani dhe Tirana janë dy qarqet më tipike se çdo të thotë të votosh Saliun dhe në parlament të të futet Ilir Meta. Pavarësisht se një pjesë e demokratëve e kanë ngrënë turpin me bukë, i kanë futur edhe një LaCivita nga prapa, nuk ka turp më të madh për një që e quan veten të djathtë, të japë kontribut që në parlamentin e ardhshëm të futen njerëzit e djeshëm të LSI-së, të cilët, sigurisht përpara korrupsionit të Edi Ramës janë krejt amator, por PD në të kaluarën ka një eksperiencë të hidhur, e cila nuk duhet të përfundojë në fund te zgjedhja e së keqes më të vogël.
Mes dy të këqiave më të vogla, sado të votojnë Saliun, ai që fiton përherë është Edi Rama, ndaj ai ka shpikur së fundmi edhe bufin e florinjtë, i cili është mesazhi më i qartë se sa kohë në krye të PD do jetë Berisha, ai do jetë kolaterali më i madh i vazhdimësisë politike të Edi Ramës.
Jo më kot Rama ka bërë gjithçka për ta mbajtur në lojë, duke filluar me lejet e ndërtimit për kulla në mes të Tiranës e duke vijuar te vula dhe logo e PD-së. E ka bërë pikërisht për këtë ditë. Sa për thirrjet e Saliut se PD-ja është shtëpia juaj, në fakt, ajo s’ka qenë asnjëherë shtëpi e demokratëve. Ah, po! Ka qenë shtëpia e tarafit dhe sektit të ngushtë të Berishës, por jo e njerëzve të thejshtë, e të djathtëve të vërtetë, të persekutuarëve apo ish-pronarëve. Shihni listat që bëri për ta vërtetuar një gjë të tillë.
Nejse, shëndeti Doktorit, se fitorja “vjen”. Po s’erdhi në 2025, me siguri do vijë në 2029.
